KAUDATU eta NIK Patrika Digitala: zure mundu digitala sinplifikatzen duen aliantza

NIK Patrika Digitalak inoiz ez bezalako kontrola ematen die herritarrei beren informazioari eta pribatutasunari buruz, eta pertsona bakoitzari aukera ematen dio «egiaztagiri egiaztagarriak» aplikazio bakar batean izateko, eguneroko zerbitzuak mugikorretik eskuratu ahal izan ditzaten.

Eusko Jaurlaritzak garatutako aplikazioak, KAUDATUk bezala, gure mundu digitalarekin elkarreragiteko modua birdefinitu nahi du.

🔗 METAPOSTA, zure eskura

NIK Patrika Digitalaren azken eguneratzeak aplikaziotik bertatik KAUDATUra sartzeko aukera dakar. Lankidetza horrek, dokumentu digitalen kudeaketa sinplifikatzeaz gain, erosotasun eta irisgarritasuneranzko bidean aurrerapen garrantzitsua ere badakar.

🛡️ Egiaztagiri egiaztagarriak: datuak baino gehiago, identitate babestua

NIK Patrika Digitalak segurtasun-estandar berri bat sartu du, «egiaztagiri egiaztagarri» delakoekin. Egiaztagiri horiek —hala nola osasun txartel indibiduala (OTI), kiroldegiko txartela, liburutegiko txartela edo Gazte Txartela, besteak beste— fisikoki zein digitalki aurkez daitezke, eta zure identifikazioak eramateko modu seguru eta erosoa eskaintzen dute.

Egiaztagiri egiaztagarriak ezarrita, NIK Patrika Digitalak aplikazioaren erabiltzaileen datuak ziurtatzen ditu. Datu horiek erabiltzailearen gailuan daude, enkriptatuta eta bere kontrol esklusiboaren pean. Erabiltzailearen berariazko baimenarekin, egiaztagiri horiek edozein unetan erabili, partekatu edo ezabatu daitezke, haren identitate digitalaren gaineko erabateko kontrola bermatuta.

🔒 Pribatutasuna, ardatz: eIDAS 2 eta zure datuen babesa

NIK Patrika Digitalak eIDAS 2 erregelamendua onartu du, Europar Batasunaren legezko erreferentzia esparrua, funtsezko zutabetzat. Pertsonen pribatutasuna babestea helburu duen erregelamendu horren bermearekin, interakzio digital bakoitza aurrerapauso seguru bihurtzen da, pribatutasuna arriskuan jarri gabe erraldoi teknologikoen praktika inbaditzaileen aurrean.

Aplikazio hori Gobernantza Publiko eta Autogobernu Sailak garatu du, eta proiektu estrategikoa da Eusko Jaurlaritzaren eraldaketa digitalean. Dagoeneko erabilgarri dauden zerbitzuekin eta bidean diren zerbitzu berriekin, NIK Patrika Digitala funtsezko tresna da administrazio publikoekin harreman erraz eta eraginkorrak izateko.

🌐 Etorkizun digital sinpleagoa eta konektatuagoa

NIK Patrika Digitalaren eta KAUDATUren arteko aliantzak erakusten du etorkizun digitala lankidetza estrategikoen bidez eraikitzen dela. Dokumentu garrantzitsuetarako sarbidea erraztuz, bi plataformak elkarrekin ari dira lanean, herritarren bizitza digitala sinplifikatzeko eta hobetzeko.